لاعبين لازم يكونوا معاك فى الفنتازى

لو كنت من متابعين الدورى الانجليزى فأنت غالباُ ما تلعب لعبة الفانتازى الخاصة بالبرمييرليغ، علشان كدا جبنالك انهارده روشته بأهم اللاعيبة اللى ممكن تختارها وتحقق لك أكبر عدد من النقاط فى الجولة الأولى.

والبداية مع مركز حراسة المرمى، فى مركز حراسة المرمى عندك اختيارات كتير لان معظم الحراس فى الدورى فى غاية التميز ولكن ابرز الاختيارات دى " اليسون حارس ليفربول " لأنه هيلعب أول جولة فى ملعب الانفيلد أمام الفريق الصاعد نوريتش، ، لوريس حارس توتنهام " ومباراته أمام استون فيلا، ولو بتدور على اختيار رخيص شويه اختار " فوستر حارس واتفورد "
دول أهم تلت حراس ممكن تعتمد عليهم بشكل عام وفى الجولة الأولى بشكل خاص.

بعد حراسة المرمى، بتختار خمسة من اللاعبين فى قلب الدفاع، وفى الأغلب المعظم بيتجه لاختيار الباكات، لفرصها الكبيرة فى صناعة الاهداف او احرازها، والاختيارات اللى ممكن تعتمد عليها كثيرة، فى مقدمتهم" الكسندر ارلوند واندريه روبرتسون " الظهير الأيمن والأيسر لفريق ليفربول والمعروفين بالعرضيات المُتقنة، بيجي بعدهم فان بيساكا المنتقل حديثاً لمانشستر يونايتد من كريستال بالاس واللى كان أفضل ظهير أيمن الموسم الماضى، وتتعدد الأختيارات "لوكاس دين" ظهير ايسر ايفرتون والسريع كالفيرارى، ولو عاوز اختيارات أرخص شويه، ممكن تعتمد على آكى مدافع بورنموث واللى عنده ماتش سهل على ملعبه أمام الصاعد شيفيلد يونايتد، أو والكر الظهير الأيمن لتوتنهام، واللى هيعتمد عليه الفريق بشكل كبير بعد رحيل تربير، وتكثُر الاختيارات " برييرا" ظهير ايمن ليستر، ألونسو ظهير أيسر تشيلسي، والاختيارالأرخص " لوندسترام" لاعب شيفيلد يونايتد.

فى مركز الوسط، وأنت مغمض أول حد بتروح عليه هو ابن بلدك "محمد صلاح" أحد أبرز نقاط القوى فى لعبة الفانتازى، تجيبه وتكبتنه، تانى اختيار بيكون سترلينج نجم مانشستر سيتى الأول حالياً، وممكن تعتمد على ساديو مانى من ليفربول، دول أبرز تلت لاعيبة، لكن فى نقاط قوى تانى وبأسعار أرخص " ريتشارلسون، فريزر، بولسيتش، ماديسون، عبدالله ديكوريه، سون، والثنائى ديقيد وبيرناردو سيلفا: كل دى اختيارات متاحة أمامك فى الموسم الجديد، ومتوقع تجيب أكبر عدد من النقاط.

ونيجى لأهم مركز وهو مركز المهاجم واللى السنادى فى عدد كبير اوى من الاختيارات، أغلب لاعبى الفانتازى بيعتمدوا على واحد من أهم تلت مهاجمين حاليا فى الدورى " اجويرو وهارى كين واوبامينج "، لكن لارتفاع أسعارهم، لازم تتوجه إلى لاعبين متوسطى السعر، وأبرز اللاعيبة دى " رؤول خمينيز" المكسيكى فى فريق ذئاب الولفز، أو الدبابة الانجليزية ويلسون مهاجم بورنموث، والسنادى دخل عليهم صفقاتين من العيار الثقيل " موسى كين " لاعب ايفرتون، وهالير واللى اشتراه ويست هام فى صفقة مدوية واللى هيكون مفاجأة كبيرة فى الدورى السنادى.

دى أهم اللاعيبة، ولكن أهم نقطة بيدور عليها لاعبى الفانتازى اى اللاعيبة اللى ممكن تجيب نقط ولكن مش بتتداول بصورة كبيرة، فى حراسة المرمى " بيكفورد" حارس ايفرتون، وحارس نيوكاسل يونايتد، وفى الدفاع صفقة ارسنال الجديدة تيرنى الظهير الايسر الأسكتلندى، وزينشينكو ظهير ايسر مان سيتى، فى خط الوسط، لوكاس مورا لاعب توتنهام وبيدور لاعب تشيلسى وبيريز لاعب ليستر، وفى خط الهجوم الاختيارات كتير، كورتونى لاعب الوولفر المنضم حديثاً من اي سى ميلان، ديلفيو مهاجم واتفورد، اشلى برانس مهاجم بيرنلى.

دى أهم الأسماء اللى ممكن تكون بها تشكيلتك فى الفانتازى، وانتظر مقال عن اهم الصفقات علشان يكون عندك اختيارات اكتر